Page 6 - 15671 Grantseeker's Guide

Ko te tono tika, ko te tono pai, he ngāwari ake i te hoko hāngi!

Anō nei he maunga te tono pūtea e kore e ekea e ngā mema o ngā rōpū hapori, te take, kua warea kē rātou ki te whakahāeretanga o tō rātou nā rōpū. He whakapau wā, he whakapau kaha anō te kohi pūtea. I ētahi wā, kāore e whakaaetia.

Heoi anō, ki te kore he pūtea, kāore e tāea te aha. Tērā pea, me ako e te kaitono ētahi pūmanawa hou me ētahi tikanga hou kia tika ai te tono. Ko te tikanga, mā tēnei pukapuka koutou e āwhina kia rere pai ai tēnei āhuatanga te tono pūtea, me te aha ka māmā ake te mahi, ā, me te aha anō ka whakaaetia tō tono.

Kua whakatūhia ngā kaituku pūtea e tono ai koutou hei āwhina i ngā kaupapa whai kiko. Nō reira kāore he take o te whakapakepake i a rātou. He hiahia nō rātou kia tohatoha tika atu i ngā pūtea, ā, e ngākau nui ana rātou ki ngā kaupapa whai kiko. Ko te mea kē, kia whakaatuhia tāu kaupapa whai kiko ki a rātou.

Ko te wawata o te Puna o Waikato, mā tēnei pukapuka ō koutou rōpū hapori e āwhina ki te whakakaha ake i ā koutou tono pūtea me te aha anō ka kaha ake te whiwhinga pūtea

E hia kē ngā puna pūtea hei whaitanga mā te rōpū, ā, ko te karāti tētahi noa iho o aua puna. Ko ētahi atu puna pūtea, he utu, he koha, he waihotanga pūtea, he tautoko-ā-pūtea, he kohi pūtea, he aha, he aha, ā, mēnā he rōpu tūpato, ka tonoa katoatia ngā tūmomo puna e tāea ana e rātou.

He pai hoki ngā hui whakangahau, ngā hui kohi pūtea i te mea he pai hei whakakotahi i te rōpū, me te hāpai i te hapori.

1